Imbolc 2012 - Cláraigh anois!

Comhdháil iontach is ea Imbolc, ar siúl 18ú Feabhra 2012 san Ionad Cultúrtha i mBaile Bhúirne. Baileofar ann Gaeilgeoirí inspioráideacha chun a gcuid smaointe agus a gcuid tionscadal a roinnt lena chéile agus leis an lucht féachana.

Beidh ochtar ag caint ann, agus seans cainte ar feadh fiche nóiméad an duine - tugann sé sin deis don lucht féachana réimse leathan d'ábhair a bhlaiseadh. Mar is léir thuas, tá cainteoirí den scoth againn, le saothar agus scéalta fíorspéisiúla ag gach duine acu. Gan dabht beidh téama an tionóil, "Inspioráid na bliana", tuillte go maith aige! Is féidir leatsa a bheith páirteach sa chruinniú éachtach seo - brúigh ar "Cláraigh" thuas chun sonraí a fheiceáil.

Ó thaobh na n-ábhar de, is féidir aon rud suimiúil spreagthach ar bith a bheith ann – ach amháin cás na Gaeilge í féin. Tá dhá chúis leis an srian sin – ar an gcéad dul síos tá neart tionól ar siúl cheana féin a phléann ceist na teanga go héifeachtach. Ach is cúis eile í ná taispeáint do Ghaeilgeoirí agus do dhaoine nach iad go mbíonn an Ghaeilge ag déileáil leis na hábhair is suimiúla agus is inspioráidí a bhfuil ann, agus nach í an Ghaeilge féin an t-aon ábhar amháin a mbíonn á phlé againn i gcónaí.

Tugtar “Imbolc” ar an bhféile ársa Cheilteach sin a cheiliúrtar timpeall tús Feabhra. Oireann an t-ainm sin an tionól atá á phlé anseo chomh maith, ní amháin mar gheall ar thréimhse na bliana a bhfuil sé ar siúl, ach leis sin mar tagann spriocanna an tionóil leis an gcoincheap siombalach taobh thiar den fhéile. Ceiliúrann an fhéile na rudaí a fhásann san earrach tar éis iad a bheith dorcha rúnda faoin talamh i rith an gheimhridh. Mar an gcéanna taispeánann an tionól Imbolc an obair a mbíonn ar bun ag daoine tar éis iad a bheith ag saothrú go crua uirthi b'fhéidir gan aitheantas leathan poiblí.